Séverin Baschung

Hey zäme! Schön siter da uf mire page glandet!

Zersch mol, wieso dueni überhoupt so gümmele bzw. Rennvelo fahre? Ig maches ja ersch sit ca. 3-4 Johr, aber es gitmer eifach es unbeschriblechs Freiheitsgfüel. Me cha bi jedem Wetter go, muess nid vill plane und da ig bim schaffe sehr unregelmässigi Arbeitszite und Freitäg ha isches ideal zum allei öbbis sinnvolls zmache. Zudem chunnt me au eifach sehr schnell sehr wit weg, und gseht eifach mega vill cooli Sache! Und die ganzi Bergwelt über Päss z’'erkunde git dem ganze no einisch e ganz angeri Dimension!

Und do chömemir bi COL-OSSAL ah. Bi COL-OSSAL isch s'Ziel alli 124 Schwizer Päss zbeklimme. Und da isch mi Wettkampfgeist grad gweckt worde. Ig bi mittlerwile scho es paar vo dene Hügle und Päss abgfahre, woni süsch bis itz nie gmacht hätt, aber es het sich eifach scho jetz glohnt! So vill schöni Orte hani itz scho gseh.

Aber bi COL-OSSAL gohts nid nur um Gümmele / Rennvelo fahre, sondern als Projekt vor gmeinnützige Stiftig “Summits4Hope” chame au e echte Impact ha. So duet Summits4Hope mit verschidene Projekt Ching in Entwickligsländer ungerstütze, mit suberem Wasser, Bildig oder Wohnungerkünft.

Bi COL-OSSAL giz also konkret itz e Event, wo sich “Big Bang” nennt, wo ig und angeri Rennvelofahrer*inne als sogenannti “Charity Riders” a eim Tag e grossi Velotour mache und Spende sammle, zum dem ganze no e zuesätzlichi Bedütigt gä. Die Spende werde ner für Ching in Maputo in Mosambik für gueti Sanitäralage igsetzt. Und das zu 100% ohni Verwaltigschöste - alles Gäld gaht i die Projekt.

Ig bi ja nid dr Typ wo süsch vill Spende sammlet, aber die COL-OSSAL Toure hei mir persönlich scho so vill schöni Erlebnis gä, dassi mi entschide ha do mol mitzmache und Spende sammle.

Und weles isch mini Challenge für dä Big Bang? Alpenbrevet Gold Rundi. 211km, 5030 Höhemeter. Inere liecht abgwandlete Variante (inspiriert nach dr Originaltour) starti mit mine Kollege in Biasca, ner geits übere Nufenenpass is Wallis, denn übere Furkapass uf Andermatt, übere Oberalppass uf Disentis und zum Schluss übere Lukmanierpass alles zrug uf Biasca. Wieso duet me sich das ah? Weissi nid, aber es git sicher 1000 dümmeri Sache zum mache als das ;-) und wie gseit, als sogenannte Charityrider hani ja no e zuesätzlechi Motivation!

I dem Sinn, ig freue mi wenn dir mi a dem Tag afüüret und wenn dir dr eint oder anger Franke dem Projekt chöit lo guet zcho!

Liebi Grüess

Séverin